១-ប្រវត្តិសហភាពពហុវិស័យកម្ពុជា
សហភាពពហុវិស័យកម្ពុជា ជាបណ្តុំសហជីព និងសមាគមមានសមាជិកភាព បងើ្កតឡើងនៅថ្ងៃទី២៣ ខែតុលា ឆ្នាំ២០២៣ ដែលតំណាងឲ្យក្រុមគោលដៅមួយចំនួនដូចជា កម្មករនិយោជិតទាំងក្នុង-ក្រៅប្រព័ន្ធ បុគ្គលស្វ័យនិយោជន៍ សហជីពកម្មករចំការ យុវកសិករជនបទ កសិករ បណ្តាញយុវជន និងក្រុមស្រ្តីជនបទរួមទាំងកម្មករពហុវិស័យអាទិភាពផ្សេងទៀត។ សហភាពពហុវិស័យកម្ពុជា មានភារកិច្ចចម្បងៗ ដូចជា ការសិក្សាស្រាវជ្រាវ ផលិតបែបគុណភាព របកកំហើញលើឯកសារ ការចងក្រង ការពង្រឹង និងពង្រីកសហជីព និងសមាគម ការកសាងសមត្ថភាព និងការ បណ្តុះបណ្តាល ធ្វើការផ្ដល់ជំនួយបច្ចេកទេស ជម្រុញឲ្យមានគណនេយ្យភាព តម្លាភាពក្នុងការរៀបចំគោលនយោបាយសាធារណៈ និងការសហការជាមួយសា្ថប័ននាៗ ដើម្បីជួយការពារ និងជម្រុញឲ្យមានភាពប្រសើរឡើងជាវិជ្ជមានដល់សមាជិកក៏ដូចជាប្រជាពលរដ្ឋក្នុងវិស័យការងារ និងមុខរបរ។ សហភាពពហុវិស័យកម្ពុជា ត្រូវបំពេញបេសកកម្មរបស់ខ្លួនដើម្បីការពារ និងលើកកម្ពស់អោយមានការគោរពសិទ្ធិមនុស្ស ប្រជាធិបតេយ្យ យុត្តិធម៌សង្គម និងមានឥទ្ធិពលលើសេចក្តីសម្រេចចិត្ត ក្នុងការជួយឲ្យសមាជិក ក៏ដូចជាពលរដ្ឋទូទៅទទួលបានសិទ្ធិសេរីភាពពេញលេញ ការងារសមរម្យ និងជីវភាពរស់នៅថ្លៃថ្នូរ។

២-ទស្សនវិស័យ
ប្រជាពលរដ្ឋជាកសិករ អ្នកប្រកបមុខរបរ និងអ្នកធ្វើការងារគ្រប់រូបទទួលបាននូវប្រព័ន្ធគាំពារសង្គមល្អ មានអភិបាលកិច្ចល្អ មានការគោរពសិទ្ធិមនុស្ស និងយុត្តិធម៌សង្គម។

៣-បេសកកម្ម
ដើម្បីសម្រេចបានទស្សនវិស័យសហភាពពហុវិស័យកម្ពុជា មានបេសកកម្មសំខាន់ៗដូចខាងក្រោម៖

• ការចងក្រង និងធ្វើសកម្មភាពរួមគ្នារបស់កម្មករ កសិករ យុវជន និងប្រជាពលរដ្ឋដើម្បីបង្កើតសហជីព សមាគម សហគមន៍ និងស្ថាប័នពាក់ព័ន្ធឲ្យមានភាពរឹងមាំក្នុងបុព្វហេតុការពារសិទ្ធិ និងផលប្រយោជន៍សមាជិកគ្រប់រូប
• ធ្វើការក្នុងភាពជាដៃគូរ និងសមាជិភាព កសាងសមត្ថភាពដល់កម្មករ-ប្រជាពលរដ្ឋដើម្បីលើកកម្ពស់អភិបាលកិច្ចល្អ រួមទាំងមានតុល្យភាពនៃការគោរព ការពារ និងដោះស្រាយបញ្ហារបស់សមាជិក
• ការសិក្សាស្រាវជ្រាវ និងចងក្រងឯកសារគ្រប់វិស័យដើម្បីកសាងភាពជាតំណាងក្នុងកិច្ចសន្ទនាសង្គមចម្រុះភាគីក្នុងការធានាបានបរិយាកាសអំណោយផល និងនិរន្តភាពសហជីព និងសមាគមនៅក្នុងការចូលរួមធ្វើសេចក្តីសម្រេចចិត្តផ្នែកគោលនយោបាយក្នុងវិស័យ
• យុទ្ធនាការ តស៊ូមតិ និងការចរចាកម្រិតខ្ពស់រួមគ្នា ដើម្បីធានាថានិយោជកចម្រុះជាតិសាសន៍ អ្នកតាក់តែងគោលនយោបាយគោរពសិទ្ធិជាមូលដ្ឋានរបស់កម្មករនិយោជិក និងប្រជាពលរដ្ឋពិសេសសេរីភាពបង្កើតសមាគម សហជីព សេរីភាពចរចាជាសមូហភាពពេញលេញគ្រប់វិស័យ។

៤-គោលដៅ
យើងធ្វើការរួមគ្នា យ៉ាងរឹងមាំដើម្បីកសាងសិទ្ធិអំណាចសហជីព សមាគម និងបណ្តាញយុវជន តាមរយ:ការចងក្រងកម្មករនិយោជិកទាំងក្នុង-ក្រៅប្រព័ន្ធ យុវជន កសិករ និងប្រជាពលរដ្ឋទូទៅ ដើម្បីការពារសហជីព សមាគម ជាមួយការពង្រីកវិសាលភាពការចរចាដោយ សមូហភាព ប្រកដោយវិជ្ជាជីវ: ជម្រុញឲ្យមានការទទួលខុសត្រូវខ្ពស់ពីសំណាក់សាជីវកម្ម និងរាជរដ្ឋាភិបាល។

៥-គុណតម្លៃ
សហភាពពហុវិស័យកម្ពុជារៀបចំឡើងដោយមានគុណតម្លៃស្នូលដូចខាងក្រោម៖

• អព្យាក្រឹត្យ៖ ធ្វើការដោយមិនប្រកាន់និន្នាការនយោបាយ ដោយឈរលើគោលការណ៍ឯករាជ្យ និងគោរពតាមរដ្ឋធម្មនុញ្ញនៃព្រះរាជាណាចក្រកម្ពុជា និងសិទ្ធិនយោបាយ សិទ្ធិពលរដ្ឋរបស់សមាជិក
• សេរីភាព៖ គោរពឲ្យតម្លៃក្នុងផ្តល់ឱកាសដោយស្មើភាពនៃផ្ដល់យោបល់ និងទស្សន:បញ្ចេញមតិក្នុងការកែលំអរប្រកបដោយភាពចម្រុះដើម្បីជាប្រយោជន៍ដល់សមាជិក
• កិច្ចសហប្រតិបត្តិការ៖ យើងធ្វើកិច្ចសហការជាមួយគ្រប់ស្ថាប័នជាតិ និងអន្តរជាតិគ្រប់កម្រិតដើម្បីលើកម្ពស់ និងការពារផលប្រយោជន៍របស់សមាជិក
• សុចរិភាព៖ ការងាររបស់យើងមានទំនួលខុសត្រូវ និងមានភាពត្រឹមត្រូវ